ಬದುಕು ತಾನ್ ಕಲಿಸುವ ಪರಿ

ಬದುಕು ತಾನ್ ಕಲಿಸುವ ಪರಿ ನೋಡಾ
ಬದುಕು ತಾನ್ ನಲಿಸುವ ಪರಿ ನೋಡಾ
ಕಷ್ಟದೊಳದ್ದಿ , ಇಷ್ಟದೊಳಗೆಳಹಿ
ಕಾಮಿಸಿದುದನೀಯದೆ ಮನುಜನ ಕಣ್ಣೊಳ್
ಭ್ರಷ್ಟವಾಗಿರ್ಪುದು ಒಮ್ಮೊಮ್ಮೆ
ಆದರೇನ್ ನಿನ್ನತನವ ಅಳೆಸಿ ತೂಗಿಸಿ
ತಾನ್ ಮುಂದಿನಿತು ನಿನ್ನ ತನ್ನ ಕೂಸಂತೆ ಸಲಹುವುದು
ನಿರ್ಬಿಡೆಯಿಂ ಬದುಕ ತಾನ್ ಕಲಿಸುವ ಪರಿಯಿದು.

ಕಬ್ಬಿಗರಿಂ ಬರೆಸಿ, ಪಾಠಕರಿಂ ವಾಚಿಸಿ
ಗಾಯಕರಿಂ ಹಾಡಿಸಿ, ಗಮಕಿಗಳಿಂ ಗಮನಿಸಿದೆಡೆಗೂ
ಬದುಕು ನಿಲುಕದೀ ದಿಟ್ಟಿಯೊಳ್,
ಕಣ್ಣೊಳ್ ನೋಡಿ ಕೈಲಿ ಗೆಯ್ಯಲು
ತಂತ್ರವೇನ್, ಮಂತ್ರವೇನ್, ವೇದವೇನ್, ವಿದ್ಯೆಯೇನ್
ಈ ಬದುಕು, ಅದಲ್ಲ ಕಾಣಾ
ನಿನ್ನ ದಿಟ್ಟಿಗೂ ಮೀರಿ ನಿಂತ ಹರಿಗೋಲು ತಿಳಿಯೊಲ್
ಸುಲಲಿತವೇ ಈ ಬದುಕು
ವಂತಕಾರಿಯ ಕೃಪೆಯಲ್ಲವೇ ಈ ಬದುಕು

ಏನ್ ಗಳಿಸಿಹೆ ನೀನಿಲ್ಲಿ, ಏನ್ ಬೆಳೆಸಿದೆ ನೀನಿಲ್ಲಿ
ಬದುಕು ತಾನ್ ಮುಂದಿನಿತು ಗಳಿಸಿತೋ ಎಳೆಸಿತೋ
ನೀನಾರು ಬದುಕಾರು
ನಿನ್ನಡಿಯರಿಯದೆ ಬದುಕೇ? ಬದುಕಡಿಯರಿಯದೆ ನೀನೆ?
ಗೆಲ್ಲುವಾರ್ಯಾರ್ ಈ ಮಾಯೆಯೊಳಗೆ
ಬದುಕದಕೆ ತನ್ನಿಷ್ಟದಂತೆ ಆಡಿಸುತಿರ್ಪುದು ನಿನ್ನ
ನಿನ್ನ ದಿಟ್ಟಿಯೊಳ್ ನೀನ್ ದೇವಂ
ಅದರ ದಿಟ್ಟಿಯೊಳ್ ನೀನೋರ್ವ ಆಟಕಾರ