ಕನ್ನಡತಿ - ನನ್ನೊಡತಿ

ಭುವಿಗೆ ಸೂರ್ಯ ಮುತ್ತಿಕ್ಕಿ
ಬೆಳಕು ಚೆಲ್ಲಿದಾಗ ಹಿಡಿದು
ಪಡುವಣದಲ್ಲಿ ತಾನು ಮರೆಯಾಗಿ
ಲೋಕ ನಿದ್ರೆಗೆ ಜಾರುವ ವರೆಗೂ
ಕಾವೇರಿಯಿಂದ ಗೋದಾವರಿ ವರಮಿರುವ
ಕನ್ನಡ ನಾಡೊಳ್ ಎಲ್ಲರ ನಾಲಿಗೆಯೊಳ್
ರಾರಾಜಿಸುವ ಕನ್ನಡದೇವಿಯ
ನಾನ್ ನಡುರಾತ್ರಿಯಲ್ಲಿ ಆರಾಧಿಸುವೆ

ಕನ್ನಡದ ಮಕ್ಕಳ್ ನಿದ್ರೆಯಾನಂದ ಸವಿಯುತಿರೆ
ಕನ್ನಡ ತಾಯಿ ನನ್ನೊಡನಾಟದಿ ಆನಂದದಿ
ವಿಹರಿಸುವಳು, ನಲಿಯುವಳು, ನಲಿಸುವಳು
ಮಾತೃಹೃದಯಿ ನನ್ನ ಆಯಿ
ಪಂಪ ರನ್ನ ಜನ್ನ ಪೊನ್ನರೊಡಗೂಡಿ
ತಾನ್ ಮೆರೆದ ಕನ್ನಡದೇವಿ
ನನ್ನೊಡನೂ ಬರುವಳೂ ನಲಿವಳು

ಬೆಳಗ್ಗಿನಿಂದ ಪ್ರಪಂಚವನಪ್ಪಲು
ನನಗೆ ಒಗ್ಗದ ಬಿಳಿಯರ ಭಾಷೆಯನರೆದು
ಕುಡಿದು ಚಪ್ಪರಿಸಿ ಕುಣಿದಾಡಿ
ರಾತ್ರಿಯಲಿ ನನ್ನೊಡತಿ ಕನ್ನಡತಿಯ
ಪ್ರೀತಿಯಾಲಿಂಗನದಲ್ಲಿ ಚಣೊತ್ತು
ವಿರಮಿಸಿ ನಂತರವೇ ನಿದ್ರಾದೇವಿಗೆ ಶರಣು

ಇದು ಬರಿಯ ಭಾಷೆಯಲ್ಲ ನನಗೆ
ಬದುಕು ಭಾವ ಬಣ್ಣ ಬಯಲು
ಅಷ್ಟೇಕೆ ಕುಂತರು ನಿಂತರು ಮಲಗಿದರು
ನನ್ನಂತರಂಗವ ಪ್ರಪಂಚಕ್ಕೆ ತಿಳಿಸಲು
ಪ್ರಪಂಚದಂತರಂಗವ ನಾನ್ ಬಗೆಯಲು
ನನಗಾನಿಸುವ ಭಾವವೊಂದೇ
ಅದು  ಕನ್ನಡ !!!