ಜನ್ಮದಿನ

ಹರುಷದಲ್ಲಿ ಎಲ್ಲ ತೇಲಲಿ
ಸಂಭ್ರಮ ಮೇರೇ ಮೀರಲಿ
ಹೀಗೆ ಇರಲಿ ದಿನಗಳು
ಈ ಸಂಭ್ರಮ ಸಂತೋಷದಿ

ಬಾಳು ಒಂದು ಮುಗಿಯದಿರುವ ಹಾದಿಯಂತಿರೆ
ಕೆದಕಿ ಕೆದಕಿ ನೆನಪುಗಳನು ಉಳಿಸಿ ಹೊರಟಿದೆ
ಭೂತ ವರ್ತಮಾನಗಳದೆ ಚಕಿತವಿಲ್ಲದೆ
ಬಾಳ ರಥವು ಸಾಗಿ ಸಾಗಿ ನಡೆಯಬೇಕಿದೆ
ಇದೇನೇ ಜೀವನ
ಹೀಗೇನೆ ಜೀವನ
ಇಲ್ಲೇನೇ ಆದರೂ ಗೆಲ್ಲಲಿ ಮನ.

ಬದುಕಿದವರು ಕೊಟ್ಟ ಹಾದಿ ಉಳಿಸಬೇಕಿದೆ
ನಮ್ಮ ತನವ ನಾವು ಎತ್ತಿ ಹಿಡಿಯಬೇಕಿದೆ
ಇದ್ದು ಈಸಬಲ್ಲ ಮನದ ಧೈರ್ಯ ಬೇಕಿದೆ
ಹರಿವ ನೀರಿನಂತ ಬಾಳು ಮೆರೆದು ಸಾಗಿದೆ
ಈ ಜನ್ಮ ದಿನಗಳು
ಈ ಬಾಳ ಖುಷಿಗಳು
ಇವೇನೇ ಇದ್ದರು ನಡೆಯಲಿ ಮನ.

ಬದುಕು ತವಕ ತುಂಬಿಕೊಂಡ ಕಣಜವಾಗಿದೆ
ಸ್ವಾನುಭವದ ಬಯಕೆಯಲ್ಲಿ ಎದುರು ಕಾದಿದೆ
ನೋವು ನಲಿವು ಬಾಳ ಪುಟದ ಸಾಲಿನಲ್ಲಿವೆ
ಮರೆಯದಂತೆ ಪಠಿಸೋ ಭಾರ ನಮ್ಮ ಮೇಲಿದೆ
ಇಲ್ಲಂತೂ ನೋವಿದೆ
ಇಲ್ಲಂತೂ ಸಾವಿದೆ
ಅದೇನು ಬಂದರು ಮಿಡಿಯಲಿ ಮನ.