ಅಮೃತ ಪುತ್ರ

ಭಾವದ ಕಡಲಿಗೆ ಬಲೆ ಬೀಸಿ
ಸೆಳೆದರೆ ಸಿಗುವುದೇನು ?
ಮೂರನುಭವದ ಮಾತು
ನೂರು ಭಾವ ಧಾರೆ
ಯಾರ್ಯಾರದೋ ಮಾತು
ಇನ್ಯಾರದೋ ಬೈಗುಳ
ಅವಮಾನ, ಅನುಮಾನಗಳ ಆಡಂಬರ
ಹಿಂಸೆ ನೋವುಗಳರಮನೆಯೊಳಗಣ
ದಿನಗಳ ನೆನೆಯುವುದೂ ದುರ್ಭರ

ಯಾವುದತಿಯಾದರೂ ಕಷ್ಟ
ಯಾವುದು ಮಿತಿಯಲ್ಲಿದ್ದರೂ ಕಷ್ಟ
ಏನೀ ಜೀವನ ಇಷ್ಟೊಂದು ವಿಶಿಷ್ಟ
ಒಮ್ಮೊಮ್ಮೆ ಬಡತನದ ಬೆಂಗಾಡು
ಮಗದೊಮ್ಮೆ ಕಾಂಚಾಣೆಯ ಆರಾಧನೆ
ಇನೊಮ್ಮೆ ಆರು ಮೂರುಗಳಾವು ಅಲ್ಲದ ಬೇನೆ
ಬದುಕು ಏರಿಳಿತಗಳ ತಂದೊಡ್ಡಿದರೂ
ತಡೆದು ನಿಂತವನೇ ಸಾಧಕ
ಹೆದರಿ ಓಡಿದವನ ಬಾಳಿಗದು ಮಾರಕ

ಸೋಲುವರು ಸೋಲುವುದು
ಮನದ ಹಿಂತೆಗೆತದಿ
ಗೆಲ್ಲುವರು ಗೆಲ್ಲುವುದು
ಮನದ ಇಂಗಿತದಿ
ಸೋಲು ಗೆಲುವುಗಳೆರಡರಲ್ಲೂ
ಸಮತನವ ಕಾಣುವನೇ ನಿಜವಾದ
ನಾಯಕ ಬಾಳ ದೋಣಿಯಲ್ಲೂ
ಹಿಡಿದ ಕಾರ್ಯದಲ್ಲೂ ನಿಜ
ನಾಯಕ - ನಿಜ ಅಮೃತ ಪುತ್ರ